(IlMinuto) – Casteddu, 22 de abrile – Ocannu puru b’at a èssere che a semper s’Oktoberfest, sa festa manna de sa birra chi ogni annu faghet andare miliones de turistas a Mònaco de Baviera. Cando ddu faghent? Dae sàbadu su 20 de capidanne a domìniga su 5 de ladàmine 2014. Totu intre su teatru de s’Oktoberfest, s’ àrea manna-manna de Theresienwiese, in su bighinadu de Ludwigsvorstadt-Isarvorstadt, chi s’agatat andende a est dae Esperantoplatz, sa pratza dedicada a sa limba internatzionale de s’Esperantu. Agatare su logu est fàtzile meda, fintzas pro more de is trasportos tzitadinos chi sunt organizados bene de a beru.

Cun sa metropolitana tzitadina ” U- Bahn” bisòngiat leare is trenos de is lìnias U4 e U5, chi firmant in is istatziones de Theresienwiese o in sa de Schwanthalerhöhe, chi est a curtzu meda. Imbetzes is lìnias U3 e U6 firmant in is istatziones de Goetheplatz e Poccistrasse.

Leende sa metropolitana suburbana ” S- Bahn”, arribades a su logu cun is lìnias numeradas dae S1 a S8, chi si firmant in s’istatzione de Hackerbrücke.Pro sa festa manna de sa birra, ismànniant fintzas is parchègios pro nche lassare is veturas e is corrieras.

Pro dormire, ddoe sunt paritzas posadas baratas e a curtzu a su logu de s’Oktoberfest, bos consigiamus custas: Pension- Hotel Schmellergarten, Pension Wesfalia, Pension Belo Sono, Pension Haydn e Pension Margit. In prus de sa birra brunda (e bavaresa ebbia!) chi est sa protagonista de sa festa, no ant a mancare àteras ocasiones pro bos ispassiare e pro connòschere sa tzitade.

S’Oktoberfest in Mònaco de Baviera est unu Fèstival populare e prenu de giòvanos, in ue sa cosa de bufare prus tìpica de su logu est sa reina, ma est semper in bona cumpangia.

Cantos e ballos traditzionales, bancos gastronòmicos (cun sartitza, puddu, pane salidu chi si narat ” bretzel” e pedes de porcu, a cantu nde podeis papare) e ispetàculos de cada genia acumpàngiant is brocales mannos de birra -non bos atriveis a pedire una “birra minore”, ca bos ant a castiare male!- chi alligrant is milliones de persones chi ddoe andant ogni annu.

Carta de identidade de su logu

© RIPRODUZIONE RISERVATA